باعتذر لك يا حبيبتي لما سبتك من سنين
لما عشت العمر من غيرك حزين
كنت بتألم عليكي وبين إديكي الحيرانين
لما كنت باشوف دموعك م العيون الدبلانين
لما شفتك سايبة ناسك راكبة راسك
وبمداسك بتدوسينا وتدفعينا للهروب
قلت أحفظ قلبي فيكي وابتعد ساعة الغروب
أشتريكي بعمر فاضل منه كام ساعة زمان
وابتعد عنك يا أجمل جزء من عمري ف أمان
كنت بحلم كل يوم بيفوت عليا إني راجع لك أصونك
كنت بحلم بالحقيقة جوه قلبك لاجل أصحح لك ظنونك
كنت باقفل لك عِنيا كل ثانية وافتكر عرضك وطولك
كنت باسهر الليالي لجل افكر كيف أَخَفِفْ لِكْ حموِلك
كنت بافتح لك رموشي لاجل اشوف شكلك ولونك
كنت عارف إن يوم نصرك قُرَيِبْ
وانت هتعدي ف أمان
كنت عارف إن يومي قبل يومك
من همومك نبتدي نعيد اللي كان
كنت دايما يا حبيبتي جوه قلبي ف ماتش كورة
في فيلم عربي في تمثيلية
وانا عايش بره أرضك والجميع عارفك قوية
كنت ممكن أعيش حياتي وعقلي متشتت عليكي
زى دقة قلبي لما ف كل ثانية تبقى مشتاقة اليكي
كنت بحلم بيكي دايماً إن أنا ماسك إيديكي
كنت عايش تمثيلية من كابوس مفروض عليكي
كنت عايش وانت غايبة عن وجودي
بس صورتك جوه قلبي هى إلهامي وفروضي
لسه مارديت جمايلك
لسه مانسيتشي عمايلك
كنت بربط لك ضفايرك
وأغسل القلب بدموعك
يابلد يامحيراني
كيف أَرَجَع م الزمن عمري ف ثواني
شايفة شمسك ولا ضِلِكْ لما بعتيهم عشاني
لما تهت عن سماك جوه أرضك كنت أشوفك بر تاني
واما سبتيني وسيبتك والفراق بقى أقوى مِنِكْ
رحت أشكي لك زماني
عايز أقولك اد ايه كان يوم خصامك بنكسر
كنت أحط عنيا فيك ومن كسوفي بتعصر
كل حرف من كلامي كان صريح
والدعاء لك بالتعافي كان مريح
وانتي قاعدة بتضحكي جوه الضريح
ليه ياغالية كنت قاسية زى عشاقك ساعات
كان حصانك يوم مايكسب السَبَقْ يِرْضَىَ السُكات
فاكرة يامَة لما كنت باقعد بالساعات على شط نيلك
فاكرة لما يوم نجاحي فرحت بيا وقلت أجيلك
رحت عنده عشان أقوله يفرحك
كنت خايف اشتكي له من أساكي واجرحك
كنت عايز اقول لنيلك اني والله نجحت ليكي
مش عشاني كنت بانجح لاجل ارفع قيمتي فيكي
كنت نِفْسِي أَفَرَحِكْ وانا بين ايديكي
اسألي نيلك يقولك عن حكاياتي عليكي
ولا يوم ماعرفت بنتك والسعادة طايرة بيكي
يوم مادق الفلب ليها وبرضه كان الفضل ليكي
اسأليه انا قلت ايه لما جَرَحْتِيِنِي ياغالية
اسأليه انا قلت ايه لما شفت الحِمْلْ أصبح موجة عالية
اسألي نيلك يقولك قلت ايه
لما شفت الظلم مَدِدْ جوه حضنك
لما شفت الظلم لابس كل ألوانك وساكن جوه قلبك
اتظلمت قصاد عنيكي وانا جوه القلب حاضنك
كنت عايزِك تبعدي الظالم ده عني وتصونيني
كنت فاكر إن حضنك يبقى بيتي ويحتويني
فاكرة لما الحب ضاع قدام عنيكي
وانا قاعد بين ايدكي بس برضه مش لاقيكي
يوم ماضاع الحب مني جيت لنيلك اشتكي له
بس نيلك كان بيسخر من مشاعري زى غيره
عارفة يامه ليه أنا مشتاق أشوفك
ليه انا في عز إنتصاري باحس خوفك
ليه أنا عايز أَرَجَعْ عهدي بيكي
ليه القلب جاى عشان يبوس ايديكي
ليه ياغالية الروح بتبقى وانتي غايبة لسه برضه ساكنة فيكي
ياحبيبتي ياللي رَجَعْتِي حياتي مرة تانية
لما شَرَفْتِي ولادك وادتيهم الهدية
لما خدتي بتارنا من قاتل عيالك
لما خلصتي حياتنا من غيلانك
لما قلتي انتوا أهلي وانتوا ناسي
من يناير واحنا شايلين المآسي
واحنا مش عايزين نرد عليكي حُكْمِكْ
احنا زى ماقلنا للظالم نِحاكْمَكْ
وانتي جوه العَتْمَةْ لسه مش حقيقة
القلق في قلوبنا أكتر من الكدبة البريئة
وانتي شايلة حزننا على جهد ضاع
حتى ضميرنا الحى ينشريَ وينباع
والكل خايف من جدار الحق
صبحت حياتنا داخلة جوه الشق
سيف اللئيم جوه قلوبنا اندق
حتى سيادته المحتمل ضربوه في ليلة برد
ضربوا رموز البلد وكل المنافد سد
كل الديابه اتنشطوا واتعفرتوا والنظام إتهد
وسؤالنا كان جوه القلوب بيفوت
على سُلْطَنِيَهْ من زيوت الحوت
على فْتِوَةْ يكون أصغر من الكتكوت
على مهرج لابس متين زعبوط
يسألوا عن واحد حكيم نقدر نجيبه منين
من مول مراكش ولا م البحرين
يسألوا عن فارس شجاع نعرف نجيبه ازاى
النخبة كبرت جاى منها حيتان
يالله يام الدنيا عودي من غيبتك
لسه متحمل عذابك والسبب عيلتك
بدي أريح كتوفي وايديا من شيلتك
عايز أَرَجَعْ ياحبيبتي كل أيامك زمان
عايز أَرَجَعْ عُمْرْ نِفْسِه يعيش معاكي في الأمان
عايزين نعيش ياحبيبتي كلنا في عزك وخيرك
يوم ما كان كل الجيران أيام زمان شايلين جِمِيلِكْ
عايز اقولك انك انتي ياحبيبتي تقدري تعدي الطريق
تقدري تِوًصَلِي حلمك لجيلك بس محتاجة لصديق
وعهد مني مش هسيبك مش هغادر مرة تانية
حتى لو كان التمن ان انتقل لدنيا فانية
اني أندفن جوه أرضك مش كفاية
اني اتولد واموت في عرشك تبقى غاية
باعتذر لك مرة تانية بس مش هى الأخيرة
باعتذر عن يوم ماسبتك لما كنت ف ألف حيرة
ربنا يدومك ياغالية وتفضلي أجمل أميرة
ليست هناك تعليقات:
إرسال تعليق