مُر الكلام(شعرأحمد محمد محيي الدين)

مكتوب عليا أشوف
العمر فيكي يروح
أسهل ما فيّا البُكا
وارخص ما فيكي الروح
القلب منك شال
والحلم مات مدبوح
من شعبك المغلوب
من حالك المقلوب
من خيرك المنهوب
م المجلس المفضوح
من خلق رافضه تسيب
باب الأمل مفتوح
من خلق حالفة تزيح
وتهد أي طموح
خايف أقول بكرهك
من كتر ما انا مجروح
من يوم ما دمي اتهدر
الكره بقا مسموح
.......................
أنا عشت فيكي الليل بحلم يزورني النور
لا طلبت خيرك ولا كان ليا فيكي قصور
ياما بكيت مقهور
شادد شراع مركبك
حالف ما تتكسّسري
بمسح دموعي أخاف
تشوفيها تتأثري
وكل ما بتخسري
تلاقيني خدامك
مادد جسور الأمل من تحت أقدامك
أجمع زهور عمري وأرميها قدامك
وسجدت علي طينك ودعيت ورا إمامك
وطردت ملاعينك وسجنت حكامك
وكل ما أبني أمل فوق الجبين يتهد
أغزل خيوط النهار
ألاقيني بغزل كفن
لما الخيوط تتمد
سامحيني يا( أمّا) بجد
ضهري اتكسر وخلاص
حملك عليا أشتد
.................................
سجن الأبالسه براح.. والحر فيكي سجين
عسكر وحراميه .. والكل متفقين

حالفين عليا أشوفك وانتي بتدمعي
وانا راضي إني أموت لو للحياه ترجعي
لكن خساره أموت وانتي بتتوجّعي
أنده بعلو الصوت وانتي ولا بتسمعي
وشهيد يجر شهيد وف دمهم تبلعي
طب إمتي راح تشبعي ؟

طب إمتي راح تشبعي

يا أرض عاشقه الدم ؟

البعد عنك ألم
والقرب منك هم
وخيبه متشاله

خايف يجيلك يوم
ويقولوا ست الزمن
كشفت شعورها عشان
مش لاقيه رجالة

..............................
مُر الكلام ..إنما

مفروض علي لساني
هكدب عليكي ازاي وانتي اللي فاهماني ؟

مستني فيكي القضا يندهلي من تاني
مربوط ف حبل القدر غرقان ف أحزاني
وهقول لربي ف يوم ما ألقاه ويلقاني
أنا عبدك اللي اتقتل .. وأمي اللي قاتلاني