ونس الغريب(شعر أحمد محمد سيد بلال)

ملمح لمح وسط الملامح ملح

والملح دهشة

وحزن فرحان بالوصول

وانتظار
معقول تشق خدودك الدمعة

ترسم رجوعك من نجوع السكرانين

صدق اللي قال

الكاس وجع بيدور

يلمس شفايف الناس يشققها

والزمن حكايات

علي وشي بسمة مملحة

ملحي اختصار موال مَلوش أخر

عزف النايات

حادق علي مسامعي

غَزل الشتا عناقيد

ليه كل ليلة تنفرط مني حكاية

لو كان صدي

للروح

ماكنتش هاعترض

لو كان فضايا براح

ماكنتش هالتفت

للضل واسرح

لو كان رحيل

مستني ليه زعق الوابور

عشم الغريب مَتوا

في وسط الزحمة والزيطة

يضفر ذكري علي ذكري

ويتغطي .. ونس

يرتاح

وش الغريب

عادم

الظن مش راحمه

كل الملامح شك

فزع المكان ... وسواس

رعب العيون .. بيسك ع المسافات

كل الشوارع متكحلة بجرحه

عشم الغريب

الملح

وانا بسمتي مالحة