هِيَّ كِدَه
صَابرَةْ عَلَى كِيدِ العِدَا
متألمةْ .. متعلمةْ
صَمْتِ الليَالِي المرعِبَةْ
حَامدَةْ شَكورةْ طيّبة
حَمْلِ الحُمولْ أَصْلُهْ هِبَةْ
هِيَّ كِدَهْ
عَارفَةْ وِلادْهَا ونَبْتَهَا
سَاجدَةْ بِتِدْعِي رَبَّهَا
حِسِّ القلوبِ المؤمِنَةْ
على طول يِفكرها بمِنَى
لَمَّا الحجيجْ يِبْدَأْ يِلَبِّي في النِّدا
تِنزلْ دُمُوعْها مرددةْ
هِيَّ كِدَهْ
الصَّمْتْ مِش كلُّهُ رضا
والعَزمْ مِحتاجِ الفِدا
آهْ يا أنا
نِفْسِي الهَنَا
يدُق أبوابِ الْمُنى
ويِجي يرتاحْ عندنا
يامَّهْ .. نقولها بقلبنا
قُوةْ إيمانَّا بربِّنا
قِيمةْ وَفَائنا لأرضنا
هِيَّ كِدَهْ
رَمشةْ عينيها هيِّنَةْ
بتقول ولادي حِنَيِّنَةْ
وفي قلبها كلّ الصَّفَا
على طول ما حسِّيت بالدفا
قلت أنتِ محتاجة الدَّوا
ردت عليَّ .. بيأسِ قلبي اللي انكوى
إيه الدوا ؟
دي الخناجر من ولادي !
شوفي شوفي مين أعادي !
تتبترْ أطرافْ فسادْ
والدماملْ في ازديادْ
هوَ دَه طبعِ العنادْ
ربي أدرَى بالعبادْ
قالوا أطراف من بعيد
قلت : وولادي عبيد ؟
فين هِمَمْهُم إيد في إيد ؟
بُصُّوا في المرايات وشوفوا
كل واحد قتله خوفه
رَعشةِ الرُّعبِ بتصرخْ بين كُفُوفهْ
عايزة مينا ويَّ خوفو
ادخلوا جوة الكهوف
فكوا شفراتِ الحروف
ارجعوا بتاريخي تاني
أصلي مليِّتِ الأغاني
اعرفوا قمتي ومكانتي
عزتي .. هبتي .. كرامتي
رّجَّعوا ليَّه إرادتي
ارفعوا شأني ورايتي
رُدّوا كيدهم عن بلادي
يُومها تبقوا من ولادي
ليست هناك تعليقات:
إرسال تعليق