من بعد تفكير السنين
من بعد فرح ودمعتين
اكتشفت خلاص يا سادة
إن الخلاصة ف كلمتين
عادي جداً
عادي تبقي شاري ناس
وعاملـّهم خدك مداس
عامل عشانهم مستحيل
وراضي منهم بالقليل
ويبيعوك وخلاص خلاص
عادي جداً
عادي لما تعيش في غابة
بين ملوك واكلة الكتابة
كله ينهش لحم كله
والسلام سموه خيابة
عادي جداً
عادي تبقي الدنيا والعة
وأنت قدام المصارعة
ولا قاعد ع القهاوي
ويّا عم أحمد قناوي
اللي شغال في الحكاوي
عن بطيخته وطلعت قارعة
عادي جداً
عادي يلـّي بنيت حضارة
لما تسقط كام عمارة
م الهرم موجود بذاته
والكرنك كاملة مسلاته
والمعابد والقصور
ذكريات كل العصور
حاجة بتأكد شطارة
عادي جداً
عادي لما تحب بلدك
تتكسر يتهد قلمك
تحت عنوان العدالة
كله كدب واشتغالة
تسقط أنت ويحيا علمك
عادي جداً
أيوة عادي .. عادي تقتل
عادي تظلم عادي تسحل
عادي يبقي كله عادي
طول مانفسك قادرة تقبل
عادي جداً
ليست هناك تعليقات:
إرسال تعليق