حصالة الأحلام بقت خاوية
ومش مليانة غير أحزان
خيط الأمل ملضوم
فـ إبرة حظك المنحوس
عكازك المِتحني بالأمجاد
اتقشرت صورته
والفرق بينه وبين جدار خيبتك
مبقاش كبير
باب الرجوع اتقفل
والضلمة بتحاوط ربوع صدرك
دخان سيجارتك
عمّال بيخنق قلبك المليان ذنوب
فنجانك المقلوب
نفسه يلمس شفتك
ويحس نشوة الانتصار
ماتش الحياة
اللي انت وافقت تلعب فيه
ناقص عدد
وقبلت تتنازل
عن حقك المطعون بخنجر من زمان
فات الأوان
علشان تطالب بالرجوع للمستحيل
فافرد أمانيك فـ المدى
واركن مشاعرك ع الرفوف
واسحب نفس
يمكن يكون آخر نفس
هيزغزغ البسمة فـ ضلوعك
ويداري إحساس الوداع
ليست هناك تعليقات:
إرسال تعليق