النيل بيشق قلوب الناس البُسطا
يتدّفى ما بين ..
جدران الطُهر اللّى محاوطاهم
يتصّفى بنومته
ف حضن همومهم ويّا أساهم
ويطرطش حُبّه
على الباصين له بحُرقة وغيظ
"من غير براويز
البُعدا إياهم"
يتعشى معاهم
لقمة خير .. النبت الطالع
من غطسة بذرة ف قلب
بحور الرّى
من بعد عِجاف الروح .. والضىّ
دا النيل عطشان للحىّ
********
وهناك ..ع الشط التاني
تلاقي أماني .. تدلدل كل لسانها
يتحجر عجز ف قلب الشوق
اللي بيتمنى يزق بيبانها
والنيل أمواجه بتعلى ؛ تسد رياح التوهة
تتغرّب كل حواس الروح .. وتعدّى
وتعكّر صفو الشوقة
لسكون الحِلمْ المادد سيفه
على جَزْر الموج
اللى بيصرخ
(دا القَدْ ساعات يمتد لمد الشوف
لو عَشــّـقْ طِيفه المكتوف
مع صبر الدهر .. وتصاريفه
وساعات .. يتحد
بسد اليأس
الطالل من وش خريفه)
*******
عَمّال – النيل – بيعافر وحده لبتر لسان الزنّ
على الوجدان
والميّه .. بتعلى لفوق
مع طوق .. بينجي الغاطس فى الهذيان
بيئن النيل من توب الويل
المحشى عَكَّارة
والغارزة أنيابها فى جوفه
بكل مرارة –
بتفتش عن أمجاد الماضى
رموز .. وكنوز .. وأصالة
عمّالة ..
تصطاد العِشرة ..
بقشرة طُعم فى خيط سنـّارة
وتاريخ ..
يتبعتر على جنبيـنه
ولا ضفة بتحمى
ودَفِة جِلدة بتحفظ دينه
وجبينه .. يتحمّل سُوط الأسياد
النازل على خدينه
وبكل مهارة .. وحضارة .. تتبعزق بين الليْن ..
بشفاه نايمين
وهياج وصراخ حاقدين
م المارة
*****
دا النيل بهتان
من كُتر أيادى الشد لمجرى جديد
...... وعديد
ونحيب الموج
على حاضر كله وئيد .. ومكيد
دا الموج .. بيزق النيل
لأيادي الفاس الواقعة سُقوفها
والشمس تنادى سمار الحق
الساكن جوه كفوفها
دا النيل بيبلبط جوه معاني
طيبتهم اللي عارفها
متعّتق عمره ف ريحة ريفها
مشتاق الحلق لطعم رغيفها
الخارج من صهد الأفران
بإيمان..إنه لإنسان
دي قلوب ..
أشجار م الخير .. وحَفِيفها
بيناجي شطوطي .. لضمة ولمّة
أعشقها .. ألاطفها
يغطس وجداني ... في حضن الفافها
وجذور النور.. مغروزة في أرضي
وحالفة لتطلع ساحبة الخير
يتحدى النهش الشايع ..
إن البور..
متضفر ويا شبابي الوردي
وفي عز الحزن الماشي في ضل خريفهم
تلقاها عيشتهم
غرقانة في طميّي لحد شوشتهم
بتكون.. في ظلام الغش اللي نهبني
قمرايا...ونوايا.. بترش عليّا حماية
تِنْبت كورود جوايا
وأفيض .. وأبيد ...كل اللي يمد الإيد
علشان يقطفها
*****
دا ( لويس)
بعيونه الياما بينهب شطي
و(عويس)
وقيامة تقوم من منبع نبتي لحد مصبي
ودي عزوة توّحد فرّعيني
من كيد الفرقة وملاعبها
ما تاريخي تاعبها
والعِصمة بحبل الله.. أشباح
ترّعب أطمعها .. تخوّفها
برباط الحق .. تكّتفها
وسيوف الحق المصقولة بصفاء النيل
الطيبة بتسكن أنصالها...وبكيّفها
والقسوة تعدي ما بينهم على طراطيفها
دا أنين النيل من روحها خطفها
لصليل أهدافها
يتوضا البُرعم من نيليّ
ويزهّر حلم "المنصورة "
بجمال أسطورة بأوصافها
والناس البُسطا ... تحّدفها
لحقيقة منسوجة بفرحة
مع نصرة والحق لاففها
****
وطموح الروح ..
بيرفرف ويا البوح
ويشد النيل .... لبراح .... حنيّة
ويحُط خَضار.. فى قلوب الطين
المسقي بروحه ، ومروية
والضحكة.. تشق بجرح .. منابع فرح فى وش النيل
تحفر له ملامح مصرية
تلقاه ...
بيلملم توهته المبدورة
على سكك الحلم المقهورة
ويشق له مجرى جديد .. من تانى
فرحان وسعيد.. بالنومة فى حضن الجلابية
اللى محاوطاه ....بتروس وبمنّجل
بتحش الروس
الواقفة تهندس خطفه بغزة بَرْجَـلْ
وبإيد همجية
تتلم نفوس القمح وتغرق فيه
وتدوب ..مع توب ... الفطرة المتعّتق
والمغزول صبر بروح" أيوب" .
تهّزم له الليل فيتوب
مع أول بصّة
من عين أنوار الصُبحية
تنبت حضارات من روح النيل
وزهور .. وسنابل شادة الحيل
وعفيّة
وملاك الشمس يتوّب كـُفر المارة
بعكارة .. وأذية
وبريق الحق يشق سواد الزيف
ويفتت كل صخور العجز ...يزيح
يدّن فى ودان الصمت .. يصيح
وإيمانه يبيد .. أشرار الريح
****
والفيض .....
"يرمى لنا التسابيح "
وصلاة الموج
تُبدر لى العدل المتحنى
بدماء الشُهدا فى شرايينه
يتخلل شوقى بموازينه
يحصد لى الخير وبكّفينه
ويرش نقاء ..مع طلعة قوية وبهية
و"شعاع "
بيداعب صفوي بملاغية
يُوصل لى النور
بالخير
بالحرية
بعد قراءة عدد من القصائد أقول وأنا مطمئن تماما ، ليس هناك أجمل من هذه القصيدة .
ردحذف