أنا الميت أو العايش لكن صدفة
أنا الدمعة اللي تنزل من عينين طفلة
أنا اللي فريد
أنا الحاجة اللي مختلفة
أنا اللي ف عز ليل طوبة
بكون شمسك الدافية
فتبقي الدنيا بعد الغيم أكيد صافية
أنا اللي ف عز حر الصيف بكون نسمة
أنا الرسام وأنا الفُرشا
وأنا الألوان وأنا الرسمة
أنا الإيد اللي تلمس شعر طفل يتيم
******
أنا اللي مليش ولا لزمة
أنا الأزمة
أنا المضروب وبالجزمة
أنا اللي مفيش في قلبي عيوب
لكن معيوب
أنا المسلوب
أنا المصدوم أنا المحروم
أنا اللي مش شايف نور السما
من كتر ما ملتها الغيوم
في ناس بتعيش تعيسة لحظة
وأنا اللي بعيش تعيس أيام
في نفس اليوم
******
أنا الصورة اللي ع الحيطة
أنا الدقة اللي ف الزيطة
أنا الشيش اللي بات مقفول
أنا الخيط وأنا النول
أنا المقتول
******
أنا الموجود في دنيا ما عدش ليها وجود
أنا المَية اللي تجري مهما حطو سدود
أنا اللي فاكرين أنه بات مهدود
لكنه فاق وقال هيعود
******
أنا اللي مليهش أي عيون
لكن بيشوف
أنا اللي شال من قلبه جدور الخوف
أنا اللي اتحدى أقوى ظروف
أنا اللي كانوا عاوزينه يعيش معلوف
أنا المحذوف
******
أنا اللي كانوا عايزينه يعيش ف عذاب
أنا اللي قفلوا في وشه الباب
أنا العايش في دنيا بيحكمها قانون الغاب
أنا الكداب
أنا اللي كانوا عايزينه يموت يتساب
أنا قادم عشان فاهم
وأنا الفايز بدون أسباب
ليست هناك تعليقات:
إرسال تعليق