متاهة (شعر محمد هلال ريان)

أحلامك زيف

وعيونك زي شموس الصيف

كرباج علي ضهر الحوجة العريان

و كتاف القهر

ملعون الزهر

ليه يحبس حلمي.. ف خانة اليك؟

بالزيف والشك

مرصوصة وشوشوك جو طابور

والساذج قلبي مابيفرقش

بين وش.. ووش

ما هي ما بتفرقش

هربان م التوهة لحضن الخوف

هربان م الخوف لكفوف أحلام ما بتتحققش

فاضطر ساعات إن أعمل ميت م الخوف

أو أعمل ميت م الجوع

أو أعمل ميت م الموت

أو أعمل ميت فيكِ بجد

واستني سنين الموت.. تنهد

أو ينهشني...

وساعات توحشني

بصّات الواد المتعافي

للبنت السمرة أم ضفاير

والعيد اللي جايبله بشاير

وإيدين الأب الممدودة

بشوية تمر

وكفوف الأم المرفوعة

في صلاة الفجر

بالدعوة الساكنة علي لسانها:

"يا رب الستر... يا رب الستر"