إحباطـات الـزمن الـمـعـاند (شعر سمير ثابت يوسف)

إحباط رئيسى :
يارب دى حكمتك : فـــى الـــدنــيـــا مـالـــى بـخــــــــــت

ولا عمرى طـرت ف فـضـا ، ولا مـــرة حاركـب يـخـــت

رغم إنى سمعت (مُوزار) ، مع إنى قريت لـ (بريخــــت)

وحــظــى لــن يـنـعـــدل لــو حـتـى رقـصـــت بـتَـخْــــــتْ

إذا كنت مشيت ف النَـشَفْ ، حتـى الـنَـشَـــفْ : لَـبَّـخْـــتْ

زمـن مُعَـانِـدْ :

يارب دى حكمتك : أصبح ف يوم مهـــــــــــــــــــــزوز !

لا وافقت أكون ملطشة ، ولا حتى أكون أراجــــــــــــــوز

ولا يوم قبلت الغلط ولا حتى قلت يجــــــــــــــــــــــــــــوز

ودا سبب محنتى وزمانى اللى ضارب بـــــــــــــــــــــــوز

دانا شيبتنى المحن : كأنى إتولدت عجــــــــــــــــــــــــوز


الحصاد المر :
يارب دى حكمتك : خلاص قعدنا ننــــــــــــــــــــــــــــــش

وزادنا عيش م الحاف ، ماعلهش لحسة مــــــــــــــــــش

وكل شئ يندهس ف الجرى لجل القــــــــــــــــــــــــــرش

نكدب على بعضنا ، نضحك يادوب ف الــــــــــــــــــــوِش

هتنبت إيه أرضنا ؟ والبذرة نصب وغـِـــــــــــــــــــــــــش

لـــــــــــــــو :
يارب دى حكمتك : والصبر له حـــــــــــــــــــــــــــــــــده

خلصت فى رحمتك : ساعات ما يتعـــــــــــــــــــــــــــــدو

دا كل باب أفتحه ، ما أعرفش مين ســــــــــــــــــــــــــده

لو فجأة ييجى الندا ، وكل البشـــــــــــــــــــــــــــــر ردوا

وزمانى تانى إبتدا : طبعا ح أكون قــــــــــــــــــــــــــــده
وجهة نظــر :
يارب دى حكمتك : نرضى ما يرضاشــــــــــــــــــــــــــى

الهم بات عندنا ، ولا قالشى : أنا ماشــــــــــــــــــــــــى

و الفقر جه لحدنا ، بعزق ما خلاشــــــــــــــــــــــــــــــى

صاحبى ضحك تريقة ، و قاللى : ياخراشــــــــــــــــــــى

دا إحنا نوعين م البشر : أَمَرا و مواشــــــــــــــــــــــــى
موقـــــــــف :
يارب دى حكمتك : أيام 00000 وتتقضــــــــــــــــــــــا

مع إن طين أرضها : مرجان على فضــــــــــــــــــــــــة

باعيد وأزيد ف الندا : لا جــــــــــــــــــــــاب ، و لا ودا

لو ويا طير السما تصحى وتتوضـــــــــــــــــــــــــــــــــا

لكن أما بانده أنا ، تحلف ماهيـــــــــــــــــــــــــــش رده



حالـة رفـض :

يارب دى حكمتك : أصبح وأبات موجــــــــــــــــــــــوع

واتوه كدا ف رحلتى ، ما نولت حتى رجــــــــــــــــــوع

يأسى عجين لقمتى ، والنكهة طعم الجـــــــــــــــــــــوع

مرار سكوتى أرفضه ، حاسس كأنه خضـــــــــــــــــوع

ف بقى طعم الملل : علـقــم قـديــم مـنـقـــــــــــــــــــوع

هـدة حيــــــل :
يارب دى حكمتك : ف الصبر ع الموجـــــــــــــــــــــود

نزرع غيطان الأمل ، يطرح مرار ع العــــــــــــــــــــود
يعْوَّج فرع الشجر ، ويـاكل جُـــدوره الـــــــــــــــــــدُود

نمشى ف طريق العَجبْ ، نوصل لِبَاب مســــــــــــــدود

أخرتها إيه ياتعب ، بتهد حيل مهــــــــــــــــــــــــــــدود

حـــلـــــــــــم :
يارب دى حكمتك : والصبـر مَلِيتُــــــــــــــــــــــــــــــــه

بانحت ف قلب الجبـل ، واليأس داريتـــــــــــــــــــــــــه

مبقاش ف حيلتى أنا غير حلم خليتـــــــــــــــــــــــــــــه

عشان يكون مَهــرها ، وعذابى خبيتــــــــــــــــــــــــــه

دانا اللى ريقى نِشِفْ ، وريقها بَليتُـــــــــــــــــــــــــــــه

إحـبــــــــــاط :
يارب دى حكمتك : باخبط ياناس ع البـــــــــــــــــــــاط

لا عنيـا فيها دمـــوع ، و لا حيلتى حتى عيــــــــــــــاط

ساكـت ونا موجــوع : ما سمـعــلى حــد صـــــــــــوات

دون العباد أزمتى : ف الفـقـر والإحبـــــــــــــــــــــــاط

دانـا لـو تـدوب جـزمـتـى مـش هـلـقـى حـــق ربــــــاط

ثورة الأطفال :
يارب دى حكمتك : حالنا صبح مش حـــــــــــــــــــــال

والفرع إيه يعدله ــ ياهل الشجر ــ لو مــــــــــــــــال ؟

وشبابنا ليه نبهدله سِوا طلبة أو عُمـــــــــــــــــــــال ؟

بمخدرات تقتله وبطالة ف كل مجـــــــــــــــــــــــــــــال

بكره ما راح يعمله غير ثورة الأطفــــــــــــــــــــــــــال

قوم يا مصرى :
يارب دى حكمتك : يائس ما ليش غيـــــــــــــــــــــرك

يا مصرى قوم إنتفض ، واقطع جنازيــــــــــــــــــــرك

واللى غريب يترفض ليولف على طيــــــــــــــــــــــرك

مانتاش ملاقى اللضا ، لهط الغريب خيـــــــــــــــــــرك

ماتقولش : أشيا ورضا ، يحرق أبو سيـــــــــــــــــرك

إيه العـمـل ؟ :
يارب دى حكمتك : قلب البلد موجــــــــــــــــــــــــــوع

لا بيرجع لصوتها صدى و لا عينها فيها دمـــــــــــوع

وسكوتها دا مش رضا ، مين يرضى يموت م الجــوع

سألت إيه العمل ؟ إيه الحل فى الموضـــــــــــــــــــوع

الثورة هيه الأمل ، شرع المصطفى ويســــــــــــــــوع

الفســــــــاد :
يارب دى حكمتك : حاسس كأنى حاطـــــــــــــــــــــــــق

عيشة مملة ، كئيبة ، ماشية كمان بالـــــــــــــــــــــــزَق

بطالة ، وفساد ، وغَلا وضايع ما بينا الحــــــــــــــــــق

ومرتبات قندلة : م الإيــــــد يادوب للبُــــــــــــــــــــــــق

ونحلم بعيشة براح وبيوتنا قد الحُـــــــــــــــــــــــــــــــق

إرحـــــــل :
يارب دى حكمتك : صبح الفســـــــــاد موضــــــــــــــة

الرشوة مالية البلد م الجامعة للروضـــــــــــــــــــــــــة

والفقر عشش هنا له ف كل بيت أوضـــــــــــــــــــــــة

أروح لمين أشتكى أحلامنا مَــــــــــــــــــــــــــــــــوؤُدة

ارحل ياشيــــــــــــــــخ الغَفر بسنينك الســـــــــــــــودة

ــ 5 ــ
ماليش نايب :
يارب دى حكمتك : دايما ماليش نــــــــــــــــــــــــايب

للناس نصيب يتحفظ ، و أنا حاضر لكن غـــــــــــايب

عفارم عليك يا أسد ، إشمعنى أنا خـــــــــــــــــــــايب

عليا الزمان إفترى ، ومنه بقيت شــــــــــــــــــــــايب

ليه أرَقَّع اللى إتهرى ، و الا أعتب على العـــــــــايب
مكتوب لـى :
يارب دى حكمتك : واهو دا اللى مكتــــــــــــــــــوبلى

نسج لى بختى الردى م الغُلب ده : تـــــــــــــــوب لى

وسوس ف صدرى صدى ، وقاللى : ماتــــــــوب لى

صرخت آه م الألم ، كل الآهات تُـــــــــــــــــــــــــــبْلِى

لو كان بإيدى القلم ، لكتبت اللى مكتـــــــــــــــوب لى


غصبن عنى :
يارب دى حكمتك : ف الدنيا مالى دلــــــــــــــــــــــيل

لا دخلتها بِرجليَّا ، و لا كانلى ليها مــــــــــــــــــــــيل

شايلنى شيل أدخلها ف الصبح أو ف اللـــــــــــــــــيل

و بنفس الطريقة هاسيبها وقتن يفيض الكـــــــــــــيل

طب تسوى إيه الدنيا ؟ والقبر ليله طويــــــــــــــــل !