سامع صوتك (شعر مصطفى محمد رمضان عبد الكريم)

سامع صوتك
شامم عطرك
حاسس إنك هنا موجودة
لما بسيبك وأبعد عنك
بحلم إني هجيلك أضمك
أجيلك ألم الناس في رحابك
شايف روحي قتيل على بابك
شايل همك
وإنتي بعيدة
وأنا جواكي بدور عنك
سايبة صحابك
سايبة القلب الطيب يبكي
وناسية الحضن الدافي في بردك
شايفة الشفقة في عين أحبابك
دايقة الذل بإيد أولادك
حاسة الغدر وساكته إكمني
بقيت في سكوتي وذلي خبير
اللي يلاقي حبيبتي يقولي
أنا راح ألف الكون بصورتها
وأدور عنها
دي وحشت نيلها
حتى قمرها إتجنن فجأة
وسرقوا تاريخها
لازم أدور عنها وأجيبها
لازم أجيلها
حاسس إني بقرب منها
سامع صوتها
شامم عطر النيل في عرقها
حاسس بيها بترجع تاني
وهرقص على أنغام خطوتها