الزيارة انتهت (شعر وائل حسين سيد عمر)

يا ترحلونا مِنَها
يا توئدونا تحتها
ما احنا ضيوف على أرضها
وحملنا أصبح تقيل
على قلبكم على قلبها
يا بخت من زاركم
وخفف فــ الزيارة عنها
هتاخدوا منا فينا كام
وتبعتونا لحد تانى حبها
ماحنا الضحية والهفية
المدارية في صبرها
لا طمعانين ف شهدها
ولا غرقانين على شطها
وشبعنا جوع من الحرام
ومسلفنا من جيوبنا
بفايدة عايدة ليكوا كام؟
والجلد باش وراح بلاش
يتمنى مُوُتَه ف حضنها
وبقينا مومياء ع الدوام
ده حتى خوفو
دارى خوفه عنها
هيأجروه للى يورد قمحها
وشربنا من كاس البصل
والنحل تاه منه العسل
على خدها
والظلم يحجب شمسها
دى ناس بتبنى فــ غواصات
واحنا حضاره اهرامات
والناس بتمشى للأمام بوشها
واحنا وراهم خلف در بضهرها
وخدنا أيه من الفراعنه
الا لعنه مــ الزمن
وبقينا ناس مالهاش ثمن
عايشين عواله على اوباما
بأحلى منحه وهيا محنه للعلن
وكل خيرها عرى نيلها ومش لها
والسكنه موكنه بالتمام
وقصوركوا تشهد بالغرام
واحنا حشم خدم غنم
وأبو فروه تاكله أو هياكلك بالهنا
أنتوا دخلتوا ع العروسه
فـــ خـــِدرها
حلال عليكوا كل حته فــ جسمها
انتوا تمصوا دمها
واحنا بندفع مهرها
تعظيم سلام
للى خربها بالكلام
واتحنى شهد نملها
حتى خيوط العنكبوت
تشهدلكوا
وتاخدوا اوسكار لما بعتوا تلها
يا معرضينها للفنا
هنسيبها ليكوا مخضره
يللى أنتوا أرسخ خلقها