سبب السُـكات (شعر حمدي الدسوقي عبدالله الشبراوي)

إضرَب بِحَدّ المَسطَرَة
دِي خريطة باهتة مِبَعتَرَة


قَطَّع خُـيُوط الشَّرنـَقـَة
لِسَّه إيدينا مِلَزَّقة
بين الحَجَر وِالمَطرقة


يا حِسِّنا المَكبوت
إمتي هَتُخرُج مِ التابوت
خايف تموت
دَ القبر أشرف مِ السُّكوت


يا أُمَّة ليه خَلَفِك بَنات
رِضَّعتي ليه لَبَن السُّكات؟



حتي الوَليد
مَولود وَحيد
مِن غير وَرِيد
مِحتاج لِنَقل الدَّم والا الأسْتَرَة


اضرب بحد المَسطرة
دِي خريطة باهتَة مبعتَرَة



أنا مُش أنا
أنا اللي قاعد هِنا
شُوفتوا الضَّنا
شُوفتوا الأُمور المُحزِنة

شُوفتوا الإيدين المُجرِمَة
قَتَلِتْ عِيدان الورد لِسَّه في مَهدها
مُش لاقيَة حد يرُدَّها
ولا لاقيَة حَد يِقول لها:
إحنا هِنا


يا عَمِّنا إللي هِناك
إحنا اللي عَمِّـمناك
واحنا اللي عَلِّمناك إزاي تِدوسنا
تِزِلِّنا وتاخُد فلوسنا
تِمِدّ إيدك بالهوا تُخنُق نَفَسنا
وف لَمِّة الناس لِلعَزا توَطّي تِبوسنا
عفريت لابـِسنا، نِطَلَّعَك ازاي وِفين


يا حِلمِنا الغَربي
أنا لِسَّه مُش عَرَبي


أنا اللي بايِع عُروبتي بِحفنِتين دُولارات
وأنا اللي مادد في إيدي باقول لسيدي هات
عِرِفتوا إيه سَبب السُّكات؟