حِتـَّه ضِـلْ (شعر السيد محمد عبد الحي الشافعي)

كان نفسه يِلقىْ .. حتَه ضِلْ

تِحميه شوية م المُضل

قام راح يـِدَوََّرْ في الشوارع

مش لاقي ضِـله .. حتى خِل

قلبه بيُصرخ في الحارات

والخلق ماشيه في ثُـبات

واقف هنا قدام وشوش

بِتْعَزِيْ فيه قبل الممات

صعبان عليهم دا الولد

رغم إنو دابت سِكتُه ...

واقف عليها كالوتد

بس المروة ذكريات

والوقت فات

واخد ما بين نابُه الولد

واستنى منه كام مَدد

بس المدد حبة موات ..



يا خلق عايشه تدِّفن

جوا السكات

يا خلق تقتل في الجنين

تسقيه شوية تلفيقات

ينزف يموت يتقال عليه

كان ناوي يملا الكون ضلام



راح الولد

يمكن يلاقي حِتَه ضِلْ

ماشي يـِدَوََّرْ في الجحور

شاف اللي زيه في طابور

من عِز أصحاب القصور

مستنيين حبة فتات

قام الولد يمشي يِدُوْرْ

شاف الرصيف

فاضي نضيف

حب يرتاح الولد

شافُه الرصيف .. طردُه أوام

كان نفسه في طَلِة رغيف

قام جاله راجل من بعيد

شاف الولد ضله قريب

قال إيه يا ناس ذنب الولد

عايش حياته كلها

كان حلمه لقمه تتوجد

بس البشر قالوا عليه

ياريته حتى ماتولد



تاه الولد جوا حياته كلها

والقلب كان عجز وشاب

نادت عليه ضله بعيده

تفتحله ييجي ألف باب

حلم الولد كان حته ضل

وأما صحي لملم حياته كلها

في حته دايبه م القماش

تحرق حياته ألف شمس

ويقول أنا ماحرقتهاش

ويقول أنا ماحرقتهاش ...