مفقود فى الوطن (شعر نُهير محمد عماد)

مفقود فى الوطن

قالك إيه؟
قالك إبنى أنا تاه فى مظاهرة وبجري عليه
قالك ظابط لابس ميري ببوس رجليه
عايز إيه ؟؟
إبنى يا بيه !!
إبنى يا باشا ملوش فى سياسة
بس يا بيه بيحب بلاده زى عنيه
قالى يا أبويا بلدنا عروسة
سابها عريسها ليلة دخلتها
صبحِتْ مصر وحيدة ليلتها
دايرة تدور على فرحتها
دايرة تنادى
ابنى يا بيه كان جنبى امبارح
تايه خايف من حواليه
قالى دى مصر يا أبويا جميلة
كبروا ديابها.. نهشوا شبابها
نهبوا حصادها وضاع بجنيه
ابنى يا بيه !!
أُمه يا باشا بايتة بتبكي
ابنى ضنايا اسم الله عليه
حُضنها بايت فاضى امبارح
عينها بتبكى ..عقلها سارح
ابنى يا بيه
شوفته يا بيه؟
مصر حبيبته غدرت بيه
مصر بتغدر؟!
مصر ما تغدر يوم بعيالها
يبقى السم ده صابنا وطالها
مصر بتبكي .. ضحكوا عليه!!
مصر ما تغدر يوم بضناها
مهما الظلم بعيد وداها
مصر أهى شاهدة عللى فداها
روحه الطاهرة شاردة بتسرح
بين شوارعها
ليلة بتبكي وليلة تزغرط
ابنى سامعها !!

لما هيرجع حضنها بكرة

واخد حقه

هجرى بلهفة وهسأل يا ابنىحضن حبيبتك قالك ايه؟