مصر يامه هى هى
شلنا «عز» و«زكريا»
جبنا دقن وجلابية
دقن عيرة مش «تقية»
دقن واخدة الأغلبية
بالخناق.. بالاتفاق
المهم الأغلبية
والمناصب والكراسى
والمواكب والمراسى
«شعب» ماشى «شورى» ماشى
مانتى طول عمرك تكية
∎∎
مصر يامه عشوائية
صرف صحى فـ «بق» مية
قال بدل ما يعلو أجرى
زودوا البنزين عليا
يرفعوا تمن الرغيف
ويقولولك إسلامية
إسلامية يعنى رحمة
يعنى فقرا ياكلوا لحمة
يعنى عيشة مهلبية
مش سياسة عالمنابر
طاعة عميا وكله حاضر
لو قبلت تقولوا مؤمن
لو رفضت تقولوا كافر
∎∎
مصر يامه عند «موزة»
وردة على كتف البلوزة
و«الجزيرة» ف بحر ميت
حد يسمع عن يهوذا؟
اللى خان روح المسيح
اللى كان سرطان قبيح
باع أخوه للأمريكان
أو للرومان
داس على كل المبادئ من زمان
عاش يهوذا بالشيوخ الكدابين
اللى باعوا نفسهم للشياطين
اللى سابوا الأمة غارقة فى البلا
وهما قاعدين يشتموا «إلهام شاهين»
∎∎
مصر يامه هى هى
دايرة مقفولة ف صنية
من عصابة.. لاغتصابه
م التعالب.. للديابة
يفرق إيه فرعون زمان
عن فراعنة ملتحين
تفرق إيه قوانين زمان
عن شريعة الكدابين
اللي فاتوا خونونى
والجداد بيكفرونى
والحمول تقلت عليه
مصر يامه هي هي
ليست هناك تعليقات:
إرسال تعليق