هكمـــل عشــــان (شعر معتز موسى عبد القادر)

لسه لون الحق باهت
لسه فاكرينك تكية
لسه حلمى ف عينى ثابت
أصله قد المسؤلية
رغم تحريفهم ف صورتك
إنتى أحلى مهما شوفتك
روحى عاشقة نيل جمالك
روحى ماسكة ف القضية

.....

وبــكرة هكمل طريقى لنهايته
هكمل نضالى هشوف اللى فايته
ولو مرة شوفت ف عينيكى دموع
هلم ف عزالى وهنوى الرجوع
وهرضى بعطشك وعــادى أجوع
ومارضاش بعلمك دة يكسر عصايته

.....
دة انا ثورت ليكى وفيكى بموت
وبعد يناير نسيت السكوت
عشانك هقاوح ولويجرى إيه
ولو حتى جالك باشا إبن بيه
يعذب ف خلقك بعزم مافيه
هنخلع جنابه
وبكرة علينا سيادته يفوت
......

بيدعوا عليا عشان رافض اركع
وقالوا دة طايش وعمره ماينفع
شيلوه من مكانه وفضوا الميدان
ولو طالبة يعنى مكانه اللومان
ونسيوا انى منهم وواقف عشان
محدش يهينهم بكلمة بتوجع
..

هكمل عشان صاحبى دمه ف رقبتى
وهلعن ظروفك وهلعن فى خيبتى
ولو مرة يأسى قابلنى ف طريقى
هفكر فى بكرة هفكر ف ضيقى
هفكر ف ماضى نشف ف ريقى
هدوس فوق شبابى عشانك حبيبتى

....

يا فكرة ف كلمة تلخص معانى
ياعالم مالكنى وساكن كيانى
إبنك هيرفع رأسك تملى
وإيه يعنى مرة منى تجلى
ورحمة شهيدك لبكرة هخلى
كيانك دة عزة وفخر لزمانى