من مذكرات ... مقبور (شعر أحمد عبد الرازق متولي)

الليل أما بـ يفرد طوله ..
الناس بـ يؤولوا للفرشة ..

وأنا وحدي آيل للقبلة ..

وببص لفوق ..

يا رب الناس الليل طوّل ..

وأنا ميّت أكتر م الأول ..

مش شايف ضوء ..


يا رب يا عالم بالواحد ..

يا رب كريم ..

يا رب أنا نفسي فـ "س" واحد ..

ألاقيله الـ "ج" ..


يا رب أنا نفسي تهديني ..


الدم السايح فـ الجامع ..

باقي إللي إتصفّى من عيني ..

والآية فـ سلسلتي فـ صدري ..

باقي إللي إتبقى من ديني ..

لسّاه ما إتباع ..

يا رب أنا نفسي أشوف الناس ..

بتصلي بجد و مش أتباع ..



يا رب أنا مين ؟



يا رب أنا مين أنا مش عارف ..
ومليش غير عين ..
والعين يا حرام معادتش تشوف ..
يا رب أنا لسايا معشتش ..

وصحابي يادوب فـ الدنيا ضيوف ..



يا رب الخوف عشش فـ الناس ..

وأنا فاكر إني مبخافشي ..
يا رب بجد أنا معرفشي ..

يا رب أنا فين ؟



انا أخر حاجة فاكرها يا ربي ..

يادوب فـ بطاقتي خانة الدين ..

انا بلمح صورتي فـ الجرانين ..

مكتوب تحتيها حروف صعبة ..

مش عارف حتّى أقراها إزاي ..

يا رب أنا جيت أعزف مرة ..

فـ لقيتني بردوا نسيت الناي ..



يا رب أنا حبّي للحاجة ..

بيسيبلي خدوش ..

يا رب أنا مش فاكر حاجة ..

إلا الخرطوش ..



أنا آخر رنّة فـ وداني ..

كات ضرب النّار ..

أنا حتّى النخل فـ أوطاني ..

مديون لي بـ تار ..

إزاي يلمحني بتعارك ..
من غير ما يحوش !!

يا رب الناس أنا مش عارف ..

خد كام ملطوش !!



يا رب الناس جوّة جنازتي ..

كات خايفة تموت ..

والشيخ فـ الجامع قام يدّن ..

راح منه الصوت ..

والصرخة طلعت من أمي ..
قادت فـ الخلق ..

بيقولوا صوتها المّرة دي ..
أعلى من الطلق ..



أنا أول ليلة فـ الضلمة ..

أنا شوفت تراب ..

ووشوش الناس إللي سابوني ..

ووشوش أغراب ..

ودموع لو تنزل ع الصخرة ..

تتحول طين ..

يا رب أنا عيشتها بالسخرة ..

و موتها مسكين ..



يا رب انا فـ القبر لوحدي ..
ومعايا ملاك ..

يسألني يقولي مين ربك ..

أفتح شبّاك ..

وأشاور ع الناس بتصلي ..
وبتسبّح بيك ..
- أنا ربّي هوة إللي أماتني ..
وهوة إللي حاييك - ..



يا رب بموت مليون مرة ..

والناس ساكتين ..

يا رب الناس الناس برة ..

شايلين الطين ..

يا رب أنا مش عايز جنة ..

ولا عايز نار ..

أنا نفسي يا رب و بتمنى ..
يعيشوم أحرار ..