اجتماعنا مش قانونى
ارتباطنا شيء مُحال
خلِّى إيدك ماسكة إيدى
يوم ما يجمعنا انفصال
ده الطبيعى فِـ المعادلة
إنُّه ينصفها التساوى
أو يكون الجمع بينَّا
صفر منزوع الحياة
نعمل ايه لو كان نصيبنا
نفصل الأرض بخطاوى
كل واحد يمشى سكة
كل واحد فِـ اتجاه
القانون فِـ الحب ثابت
والنهاية مش جريمة
انحراف الضلع جايز
حتى فى الروح السليمة
حكمة الكون انْ يفصل
بين سما وارض ، الغلاف
زى نقطة وفوقها فصلة
واللى يجمعهم فراغ
مهما طال البعد بينا
لسه برضو الدم ماشى
جوه شريان المحبة
م الفؤاد حتى الدماغ
ليست هناك تعليقات:
إرسال تعليق