حلم الهنا ف طرف اللسان
والنفس مشتاقة لبقية العمر
وفوق صوابعى ملمس الأحلام
وقت أما طبطب لى الزمن ...
ع الضهر!
................................
صوت المنشد :
"يا سابل الستر
أنت المعز برحمتك
هب لى لسان ذاكر
وإزاى راح أوفى نعمتك
وإزاى هكون .. شاكر
ده الشكر نعمة لوحدها
يوجب لها ..
ميت شكر"
................................
يأتى النداء :
{ إنا فتحنا لك .... }
يفوق القلب م السكرة
على صراخ الوداع بالموت
يزيد الحزن ..
يستقوى
ويقتل ضحكتى بفرقة
ويترك لى الأمل مكسور
ولانافع
ولاشافع
ولا يغفل شعاع من نور
يونسنى
يرشرش ف العيون ضلمة
وأعيش يونس ف بطن الحوت
................................
ع الربابة :
"بعد الفراق يا اُمه
الزاد صبح علقوم
الهم زاد يمه
ماعرفت فيه العوم"
................................
يأتى النداء:
{ لا تحزن ... }
.. وبتغرب
ما بين الدمع والمكتوب
وبتقاسم مع الأحزان ساعات الليل
بدون ألفة
ويصبح صبحى .. أتخفى
ف ضحكة ناس كتير غيرى
ما تشبهليش ..
ولاتشوفليش
ف عينى الباهتة دمعاية
وفجأة الشمس تسمعنى
تنور حتة جوايا
وأشوف فرحى
أنا ..
أستغرب!
................................
صوت الشاعر:
"الحلم لو ليه طعم يبقى ف شفتك
غنوا الملايكة سيمفونية ف ضحكتك
أنا القتيل ف العشق يا سمرا
أحيى لى قلبى بلمستك"
................................
يأتى النداء:
{ إنا أعطيناك الـ ... }
شهد الحياة ملفوف ف توب أنثى
ضحكة عيونها جنة للصابرين
بالثلج والماء والبرد ..
يغسل ذنوب اليأس من إنفراج الضيق
تفرد رموشها شط للغرقان
ف حبها المرسى ..
وبل الريق
(طوبى) لمن نال قلبها
(ويلٌ) لمن منه انطرد ..
................................
صوت المطرب :
" ياللى كعوبك دوراية
سبحانه من خلقك آية
عشقك هداية وغواية
نظرة عيونك دى بتأسر
برقوق شفايفك ربانى
خدنى وعندك ودّانى
نسانى حيرة أحزانى
وف كل يوم حبى بيكبر
أدوب ف خطوك وف رسمك
وتجننى ميلة جسمك
لاعمرى أمل أنطق اسمك
وكل مؤمن ليه كوثر
ليست هناك تعليقات:
إرسال تعليق