الاثنين، فبراير 20

شيطان حيران (شعر عزيزة علي)

وليه تعرف مَقام الشئ مدام فــ إيديك

ومش بيضيع

وليه أصلاً تعاشِر ناس مدام بتخاف

مِن التَوديع؟

وليه محافِظ على الصُورة ..

مدام الأصل مِتكَسَر

وليه بتلَملِم الأفراح فـ دُنيا

حُزنها مبَعتر

وليه خايف تقول أكتر؟

دام صوتك ماهوش

مَسموع

وليه بتجوع

وليه بتنام ..

وليه فـ الأصل تتشَعلَق على شماعة

مـ الأحلام؟


وليه سايب خضار قلبك فـ وِسط قلوب

ماليها سواد

وليه الطيبة دي تظهر

مع إللي يبان

من الأوغاد

وليه بتعادي فــ المسافات

وماشي تَعِد فـ الحكايات

وليه قابِل تكون فاصلة فـ نَفس القصة

دي بالذات؟

وليه شاري

ومُش بتبيع

وليه راضي تكون ذكرى فـ وِسط

مراسِم [ التشييع ] ؟


هناك تعليق واحد: