موال بلدنا (شعر مصطفى طاهر)

موال بلدنا

كَبَّرْ تعيش

قول لـ اللي محتاجلك ما فيش

اللي اختشوا ماتوا خلاص

اتعلم انت ماتختشيش

الليل هجم

وانت اللي شيدت الهرم

بتمد إيدك للعجم؟

شاغل دماغك مين حيحكم في البلد؟

تفرق مع الأرنب في إيه

لو راح أسد وغزال هجم؟

كَبَّر بقى كبر بقى

هو انت فرحان بالشقا

هو اللى كبر كان تعب

ولا اللي دور كان لقى

من كام سنة

شايل حضارة كام سنة

بتلف بيهم ع الجيران

تفرش ستارة قوتك

وتخبي في الضعف اللي بان

تفرح عشان أهل الملك

ترقص عشان المقبرة

إزاي حتمشي المركبة ولساك بتتشعلق.. ورا

زحف التتار على باب  مدينتك

وانت تايه في السؤال: هل يا ترى؟

خوفو اللي باني الأهرمات  له كام ولد؟

بيملكوا ... وإمتى اتولد؟

بدل ما تمسك في التاريخ

إمسك في جغرافيا البلد

طول عمرنا بنكتم جراحنا فقلبنا لآخر السنة

ونكتب على وش النتيجة..عام سعيد

طول عمرنا نروي أملنا بصبرنا

يطرح أملنا صبرنا

والصبر يطرح من جديد

طول عمرنا الحقد يمشي جنبنا

ونغني بكرة الخير يزيد

طول عمرنا بنبيع في راس (سيدنا الحسين)

..... علشان (يَزيد)

حتعيش تقاتل مرحبا

حتعيش تناضل مرحبتين

كل اللي بيناضل مقاتل

وانت بس تروح لمين؟

أحسنلك اهرب من حالين

عيش بين وبين

إياك تقوم إياك تنام إياك تثور إياك تحب

تلبس قميص الدروشة والدم كدب

امسك بسيف المعركة

وارقص على ضهر الفرس

اشتم في كل السجانين

والعن في كل اللي اتحبس

تهرب لفين

اسمك مجرد أمر في جيوب العسس

احنا اللي بنفكر غلط

احنا اللي عايشين بالعبط

احنا اللي بنموت في المعارك والمدابح

وفـ سواد البحر وفـ قطر الغلابة وفي السلام

احنا اللي عايشين والسلام

احنا اللي مش فارق معانا أغلبية من معارضة

احنا اللي لما نجري ونشوط الامل

لازم أكيد يخبط فـ عارضة

إحنا اللى سامعين الأوامر

احنا اللى سامعين الكلام

من صباح الخير يا مصر لحد قرآن الختام

احنا اللى راضين باللي فاضل منهم

بشمس وهلال الشهور عشان نصوم

أغلب من الغلب الغبي

وهمومنا بِتبَكِّي الهموم

بنعيش خفيف وننام خفيف

... ونموت خفيف

طب لية بقى بعد اللى فات مات اللى مات

في طابور طويل علشان رغيف

هو احنا ليه مش محسوبين

رغم اننا بنزيد كتير الله أكبر

نتعد بس أيام صناديق الانتخاب

وساعتها بس بحكمته نتعد أكتر

كبر وفكر في انتخابات النوادي

وأمور المنتخب والكاس في لبس البنات

تابع مسابقات الجمال والموضة

دافع عن ريادتك للدراما

إحنا أجدع منتجين لمسلسلات

عيش زينا إياك تفكر فـ اللى جاى

خليك مافيش حظك كدة

موال بلدنا فكر تموت

..... كبر تعيش