قال علي وشك يبان
أصلك ندّاغ لبان
عمرك ما تخُمنا
فاهمينك من زمان
إظهر وعليك أمان
ع الوش.. إتنين كمان
مكشوف وباين لنا
دقنُه.. وأهي طول دراعُه
لايقة علي كل عصر
بيؤم الناس جماعة
مغرب وقبله عصر
وفي الكنيسة طاعة
والخير مالوهش حصر
ده شيوعي وببراعة
وبيلعن كل قصر
أصله ساحر عنينا
ومطوّع قلبنا
حاوي وسط الجنينة
ولاممنا كلنا
يصرُخ ذات اليَمين
ويقول يا ناس حرام
إصحوا يا مسلمين
أطيعوا ده الإمام
يحلف تلاتين يَمِين
"بيوحنا المعمدان"
يُذكُر "تونج" و"لينين"
ويبشر بالوئام
والناس مبلمين
مسحورة بالكلام
موهوب ابن اللذينا
فاكر هيهتّنا
موهوم اللي يعادينا
ويشتت شملنا
يا أبونا الشيخ جيفارا
يلا زيح القناع
مني إليك أمارة
واسمعها باقتناع
دي الناس زينة وأمارة
ما يحبوش الضِباع
خدها يلا بقاصرها
ما تضيّع وقتنا
ونقي طريقة غيرها
يمكن توصلنا
ليست هناك تعليقات:
إرسال تعليق