كان نفسه يطير(شعر نعمة ناصر حسن)

اتفض المولد من حواليك
والدمعة المرمية ف ركنك
بتشد المشهد للداخل
فتسد فــ روحك كام فجوة
بتدور عينك على مرسا
شباك العمر المقفول
يتسرسب منه صحاب تاهو
فى مولد زحمة
المولد
كان حلم مزيف
بهرجة الألوان والزينة
وطبول بتبشر بالفرحة
والكام مرجيحه
بتطلع فوووووق
وبتنزل
على روح دراويشك
والحي شمال الحي يمين
الحضرة تغيب
وعرايس مولد يترصوا
وبنادق لعبت ع الفارس
فوقع مكسور


متشعلق ف نزيف تفاصيلك
وحدود العمر ماتسمحشى
بركوب اللعبة اللى نسيتها
على ضهر حصان- قبل المولد
كان نفسه يطيرررر.