الاثنين، فبراير 20

صباح الأحرار(شعر محمد علي سمير عبد الرحمن)


صباح الحب للأحرار

صباح بيجَمَّعْ الثوار

يدور في زحمة الميادين

يجمع شعبنا الجبار

سلام يا مصر يا غالية

سلام يا ام الرايات عالية

تعالي اتهنِي بولادك

ونبت أرضك الحرة

صباح الخير يا درة

صباح بيفتح الشبابيك

ويمحي عيشتك المُرَّه

صباحك في طابور العيش

يناولك لقمة ويبارك لثوارك وأحرارك

صباحك نور وملحية

تحلي عشتك العدبة

وحبة زيت وضحكية

تلعلع في وشوش غاضبة

صباحك زحمة الأتوبيس

عروسة ينتظرها عريس

ورشة ملح عـ الحساد

ودعوة تكتر العيله

صباح الخير يا غنويه

صباح الخير من الازهر

بينشر ريحة العنبر

ويقراه الفاتحة ويصلي

ويدعي تدومي يا غالية

صباحك نور في قلب الدير

يمجد سيده ويرتل

ويقرا وِرْدُه مـ الإنجيل

ينورلك ضيا القنديل

يباركلك مياه النيل

صباحك شابة في الجامعة

بتخفي في القلوب دمعة

وتقرا رسالة المحبوب

وتسرح في الحروف وتدوب

وتخفي خدها الأحمر

صباحك شمس بتنور

وإيد تبني وبتعمر

صباحك عقل بيفكر

ويوم ما حد يصغرك

يقوم يهد ويدمر

أُسُود تحرسك وحدك

وتحلف لك تصون عهدك

صباح النور علي الزنازين

صباح يِفَوِّق النايمين

يجمعهم علي الميادين

في يوم خمسة زايد عشرين

هنجمع شملنا تاني

ونهتف كلنا ونقول

صباح إسود غطيس لونه

علي الظالم وأعوانه

وكل الحاشية وجيرانه

تعال يا مصر ما تخافي

خديني في حضنك الدافي

وإرمي الخونة في الزنازين

تعالي متخفيش مـ الطين

ده هو الباقي لو نفهم

صباح الخير يا مصريين

ليست هناك تعليقات:

إرسال تعليق