أنا قلبي نهر
وفاض على الجانبين
فلا هتعرفي تشربي
ولاحتى هتعومى
وانا نفسى انزل المية
بس انزل المية بهدومى
فلا هتعرفى تشربى
ولاحتى هتعومى
متسأليش اسئلة كل اجابتها
كل البنات زيك تزعل اذا جتها
خليها براحتها الدنيا براحتها
ومدى لى راحتك مخدة لجل ما انام
قد عام قدام متساليش اذا كنت
زاهد ولا انا زهقان
أنا قلبي نهر
و فاض على الجانبين
فلا هتعرفى تشربى
ولا حتى هتعومى
كل الصبايا قبلك إنتِ دبحونى
وعلقوا راسى على سور مدينتهم
لا العشق شافعلى ولا العشرة داينتهم
أتاري الحكاية خيال مآتة فى غيطهم
أول ما غلبوا الهوا أصبح مالوش لازمة
أنا كل بنت فاتتني سابتلى مية أزمة
روحي ما بين شاردة وملتزمة
وضلوعي من كتر الجراح والله كرهوني
فلا هتعرفى تشربى
ولا حتى هتعومي
أنا آخر واحدة حبيتها
مقاليتش من القران غير
والشعراء يتبعهم الغاوون
وكان لازم تقولى بعدها
هذا فراق بينى وبينك
بس مقالتليش تأويل الجرح
اللى فى قلبى ايه
شوفى كتافك تستحمل كام جرح
وتعالى شيليه
أنا واحد من جوه متفتفت
لو لمسه حتى الهوا
حتى الهوا هينفد
حصان حلاوة
وعيال عليه بيتخانقوا
كل اللى حبه فى يوم
رجع فى يوم خنقه
فلا هتعرفي تشربي
ولا حتى هتعومي
ليست هناك تعليقات:
إرسال تعليق