نُصْ يُوْمْ (شعرعلاء عبد الله)

لِيلِتْهَا كُنتْ أنَا بَنْكُشِكْ والضِحْكَة كَاتْ عَادَةْ
أغلَى مَا عَندِكْ تِضْحَكِي وف وِشِّي بِزيَادَةْ
عَارْفَة إنّي رَايِحْ أمتِحِنْ دَعِيتيلي بَعْدْ الفَجْرْ
حَبِّبْ لِي فِيكْ خَلْقُه .. وتعيشْهَا في سَعَادَة
"حِلْوْ الحَيَاة لمَّا اْنطَفَى .. تِبْقَى الحَيَاة سَادَة"

...........

كَانِتْ حِكَايَة بِتِبتِدي أوِّلْ مَا أُمِّي بتِتِصِل.
قَالِتلِي يَا ابني أنَا مِحتَاجَاكْ
قُلتِلهَا خِيرْ في إيه حَصَل؟
كًانِتْ سَاعِتْهَا بِتِنْدَهِكْ بَعْد "الصَلاة"
تَاخْدِي العِلاجْ
وإنْتِي "هِدُوئك" كَانْ قَلَقْ
بَحْـر إتفَلَقْ
مَلْهوشْ أرَارْ
قَلبي اتخَطَفْ
ربِّي بيِلهِمْنِي الثبَات
"قُلتِلها عَارِفْ عَايزَة إيه"
بَس انتِي دِلِّي عَ المَكَانْ
"سِكِتْ الكَلام بِينْ البَشَر
والكِلمَة دِيه لِرَبْ العِبَادْ"
...............

كَانِت "وَصِيتِك" إن أنا أجِيبْ الكَفَنْ
"عَلَشَانْ مَعَاكي هَيتْدِفِنْ"
وإنتي الغَلاوَة والمَحَبَة
اتْخَلَقُوا عَلَشَانِك..

..........

فَتَحـْتْ بَابْ بِيتِي
والرِجْلْ جَارَّة الرِجْلْ
جَنْبِك عَلَى سِرِيرِك قَعَدْت
وسَاعِتْها انَا إتْشَهِّدْتْ
ومسِكْت إيدِك بَتْرِعِشْ
بَحْرَ الألَمْ غَضْبَانْ
بِيفُكْ دَمْعَة بدَمْعِتِينْ
ويكَلِّمِكْ
كَانْ نِفْسُه رَدِّكْ لِلسَلامْ
"أوْ يِسْمَعِكْ حَتَى تِنَادِيه "
ويِنْكُشِكْ وتِدَادِي فِيه

............

لَكِنْ خَلاصْ مَفِيشْ أمَلْ
كَانْ فَاكِر إنِك مُحْتَمَلْ
لَو كَلِّمِك يُومْ تِسْمَعِيه
وكَمَانْ تِرُدِّي انتي عليه
"حَضَنِك ونَامْ جَنْبِك وكُلُّه يِقَوِّمُه"
مِينْ بَسْ غِيرِكْ يِفهَمُه
هوَّ اللي كَانْ ليكِي "وَلَدْ"
وانتي مَكُنتيشْ "جِدِّتُه"
إنتي اللي كُنْتي صَاحبِتُه
ضَهْرُه اللي يِلقَاه لِيه "سَنَدْ"
يُوم شِدِّتُه
............

"صَلِينَا بيكي في الأوليا"
كِيفْ مَانْتي بِتْحِبِّي
كل أمَّا بأدْعِي بَسْمَعِك
بـ أمِينْ وبِتْرُدِّي..
يُومِك يِكُون "الإتنِينْ"
"وبتِعْشَقي فيه الصِيَامْ"
وأسْمَعْ كَلامْ
لِيلتِك بِطَلعِتْنَا لـ "رَجَبْ"
رَبْ الكَرَمْ
كَرَمِكْ
"عَشَانْ صُنْتِي الفِرُوضْ"
أخِر الفِرُوض كَانِت صَلاةْ
ويكون سَلامِك في الصَلاة
تَسلِيمْ أمَانَة من الحَيَاةْ
"حُسْنْ الخِتَامْ"
والدَفْنَة نَازْلَة بِتَكْبيرَاتْ
والبَرَكَة في طُلُوعْ الأذَانْ
"قَلبي هِدِي"
وعِنيَّا بَطَلِت البُكَا
والبَسْمَة بَدَأت تِترِسِم
ويَّا الرِضَى
..............

فكِّينا عَنِك دَه الكَفَنْ
كَان "اليمين" نُومِك
وإنتي اللي عَارفَاني فـ جِنَاني
بَعْد أمَّا كُلُّه يِوَدَّعِكْ
أنَا هَبْقَى "آخِرْ" مَنْ يِلمِسِكْ
وبُوسَة ليكي عَ الجِبِينْ
آخِر مَا تِلقِي في الحَيَاة
"مِنِي أنَا.."
عَلَشَانْ تِكُونِي مِطَّمِنَة
"فَكْرَانِي جَنْبِكْ بَبْتِسِمْ."